Ullinganir koma!

Um helgina gerðist sá gleðilegi atburður að ofurþjónninn og námsmaðurinn Annel Helgi flutti inn að Myllusetri og að sjálfsögðu kom kærastan (Ólöf) með. Eins og sjá má á meðfylgjandi mynd kunna þau skötuhjú að njóta lífsins svo um munar.

Til að fagna þessum tímamótum ákvað Óðalsbóndinn að slátra lambi og bjóða til veislu á sunnudagskvöldinu.

Um það leiti sem lambið var að verða að ljúffengri steik í ofninum bárust mér þau tíðindi til eyrna að unglingsparið væri bara ný búið að snæða þennan líka dýryndis Subway með frönskum og "kíbs" í eftirmat.

Ekki tók betra við þegar fréttist að Aðalheiður hefði hitt vinkonur sínar í Smáralindinni og væri ekki á leiðinni heim í bráð.

Bjartur var orðinn vægast sagt flóttalegur þegar ég dró út ilmandi steikina og fékk ég skýringu á því fljótlega. Dyrabjallan hringir og inn gengur piltur sem Bjartur hafði mælt sér mót við til að fara með í bíó og með það var hann rokinn.

Óðalsbóndinn sat því einn við kertaljós og gerði steikinn skil eins og honum einum er lagið.